#NDIPENYEREIWO

#NDIPENYEREIWO!

MWARI ndipenyereiwo!,

Honai ndoberekera muvhu sembambaira,

Wandakatumbura ndega vangu vana handivaoni,

Vangu vana varipiko vehama?

Hama dzacho kungondirapa meso nemhiripiri.

Vamwe dyu netsono kubaya rondaro,

Kubvunza hanzi ,'Toda kutumbura munzwa'.

Kuwedzera nhamo pamusoro peimwe.

Wangu Musiki ndipenyereiwo

Icho chiedza chenyu Mwari,

Ngachivhenekewoka hupenyu hwanguwo,

Honai panyika pacho ndave chisekowo

Panyika changu handinawo

Hongu, zvinonzi simba nechako chimwango,

Ini ndangove imba isina kana bango,

Ndinongosekerera vamwe hongu zvechirango,

Chandoziva hapana sendiri musango,

Asi zvonzi rinopa waneta iro sango

Zvokwadi Mwari ndipenyereiwo!

Maziso angu ndongoti udyu udyu, here?

Kunge huku yadokerwa iri kunze kwemusha,

Misodzi pamatama senzizi haipere,

Ndoita sendinoponera mudanga ramapere 😭,

Varoyi here vanodya vana vangu sederere?,

Ko iye rufu anodei pahuku yemweni ,kungoti apembere?

Vamwe pavanotuma wavo,ini neshungu tuku,

Ndofemera pamusoro sendere,

Potse kutoikwetsura sechana iyo mhere.

Ndipenyereiwo Ishe zvipere.

Ukaona yave kupinda mumahobi agudo ziva yatanga kare,

Ndadzipotsa shanu vachifa,

Wekupedzisira uyu ainge akanyarara kudhara,

Neni ipapo ndakapotsa ndanyarara,

Kukurukura hunge wapotswa.

Tariro ndinayo asi rutendo rwaenda,

Ndaedza zvose,zvakona n'anga Wedenga,

Pasirivheri nendarama,haiwa ini ndiri hwereshenga,

Hembe dzangu pamucheno ndinoita somwenga kuchena.

Handina wandonyima,ruoko ndinotambanudza,

Rangu dambudziko ndirori randatsanangudza.

Hapana chandisingaite ,kana mombe ndofudza.

Kutaura kuno ndingadai ndakudza,

Ndipenyereiwo Mwari zvigondifadza.

Zvakadaro ndoberekera pachuru semajuru.

Kunamata handinete, NDIPENYEREIWO.

~Dean P Dumbura (#DDP)

#BeBlessed

#HappyNewYear